2個做伙得著2002諾貝爾經濟學獎，其中的美國心理學家孔勒曼(Daniel Kahneman)，在伊所寫的《思考，緊和慢》(Thinking, Fast and Slow)，內底有講著「底漆效應」(priming)的概念。在專業的油漆工程，攏先漆一層拍底的油漆，著是叫做「底漆」(prime)，然後才會漆一層真正色緻意愛的油漆，完工了咱會看著整個油漆工程顯現期待的效果，底漆卻是被蓋哩看祙著。

孔勒曼所講的「底漆效應」著是解釋，人在生活環境中會接觸著各種奧妙的線索，若像「底漆」，彼種線索會起動人頭殼內系統1(System 1)的思維，在無意識中影響咱的思想、判斷和行為，咱卻往往對彼種線索無感覺嘛攏呣知有受著左右。比如：聽著、看著或想著「老人」這個名詞，著會予人不知不覺行路變慢，著是產生所謂的「佛羅里達效應」(Florida Effect)；看著或想著和金錢相關的圖像，會予人變較自私自利，較祙願意主動去幫助別人。

孔勒曼強調「底漆效應」是有經過實驗證明的結果，表明人的想法和概念會自動激發大腦的神經網絡，來塑造咱在接續落的情境中的反應。

台灣社會因為忽視台灣民族主義，致使台灣人欠缺追求民族願景的熱情和理想，尤其失去強烈的敵我意識，社會整體是墮落做一個錢錢叫的社會。所以在舊年的大罷免，支共走狗立委吼要普發1萬，台灣社會足濟人著自私愛錢，呣管台灣前途，願意心肝放予狗咬去，充分反應「底漆效應」。仝款，嘛會當解釋是安怎台灣選舉，素質足差的地方惡霸遐容易靠買票當選。

大家若有注意，支共走狗立委這段時間為著削弱台灣的國防和施政，不斷在咱社會透過媒體釋放「錢」訊號，目的當然是要啟動無強烈敵我意識的台灣人，自私自利無顧民族利益的心態。怹無一定知影有「底漆效應」的理論，卻著是在運用「底漆效應」操縱台灣社會。世界民族解放運動的經驗啟示咱：民族主義上會當抵抗、破解敵人的心戰。高舉台灣民族主義，台灣人才有活路。